పాపాయి గృహప్రవేశం

 చి. సౌ కామేశ్వరి, చిరంజీవి నాగరాజ గార్ల నూతన గృహా ప్రవేశం సందర్బంగా.... శుభాకాంక్షలతో

నూతన గృహమును జూడఁగఁ

జేతోమోదంబుఁగలిగెఁజిన్మయ రూపా! 

వేతన జీవుఁడ వయ్యును 

భీతినినే జెందనట్టి వీరుఁడవార్యా!

నీవు కనినట్టి కలలకు నెఱవుఁజూపి

ఫలిత మాశించు విధముగ వలను పన్ని 

కష్టములకోర్చి చివరకు తుష్టి నొందు  

నాగరాజార్య! నీకివె నమశతములు

మంచి మూర్తాన కుడికాల నంచితముగ 

గడప లోపల గోమాత తోడనునిచి 

బంధుగణమును నీవెంట బంధురముగ 

కదలి వచ్చుట చూడంగఁగన్నులదరె

వేద మంత్రాలు సదువంగ వేదవిదులు 

యఙ్ఞ యాగాది క్రతువుల నార్యులపుఁడు 

శాస్త్రరీతిని జేసిరి శ్రధ్ధతోడ 

నేమి భాగ్యము మీయది యేమి భక్తి!

మనుమ రాళ్ళును మనుమల మందితోడ  

జీవయాత్రను సాగించు మీవసుధను 

నందుకొనుమ శుభాకాంక్ష లందుకొనుమ  

నాగరాజార్య! జామాత! త్యాగశీల!

సకల శుభములు గలిగించు శంకరుండు 

నాయురారోగ్య సంపద లన్నియిచ్చి 

కంటికినిఱె ప్ప యట్లయి కాచుగాత! 

యెల్లకాలము మిమ్ములఁజల్లగాను

ఇట్లు  

కుటుంబ సభ్యులు

తపమొనరింపరాదు.....

 ఉపకృతిఁజేయు చుండునెడ తృప్తిని పొందినవారు కల్గుచో 

తప మొనరింపరాదు మఱి దానముఁ జేయఁగ వద్దు సజ్జనుల్”

చపలపు బుధ్ధితోడమఱి సాములు కొందఱు కక్షతోడనే 

కుపితమనస్కులొందుచును గోరిక మీఱగ హానిఁజేతురో?

ఇల్లరికమందు....

 ఇల్లరికంబునందుఁగల దెంతయొ సౌఖ్య మటండ్రు పండితుల్

కల్లయుగాదుసత్యమది కాంతను జూచుచు నుండ వచ్చుగా
బిల్లల పుట్టుకై వడిని ప్రేమను బంచుచు జీవకోటినిన్
బల్లకి మోతనా పగిది పైరవి లీలను జేయ వీలగున్

ముచ్చట.....

ముచ్చట గొల్పునాసతిని మూఁడగు కన్నులు గల్గువానికిన్
బచ్చగనుండు గద్దెపయి పాణికి పాణిని గల్పఁజేయగా
వచ్చిరి తల్లిదండ్రుల వివాహముఁజూడఁగ పుత్రులెల్లరున్
జెచ్చెర దేవలోకమును జిన్మయ మూర్తులఁజూడ వచ్చెనే

నీరుచాలక.....

 పంట పొలములు పూర్తిగాఁబండిపోయె 

నీరు చాలక,దీపమ్ము లారిపోయయెఁ  

బెద్ద గాలులు వీచుచుఁ బిడుగు పడఁగ 

నెపుఁడు వచ్చునో దీపాలు సెప్పలేము

నీరము లేకాదీపములు

 సారము గల్గియున్  బుడమి సాలుల వెంబడి గట్టియాయెనే 

నీరములేక,దీపములు నిల్చివెలుంగకయారెఁజూడుమా 

జోరుగ వర్షముల్ గురియ చూరులనుండియు ధారకారగాఁ

దోరపు చెమ్మయుండుటన దూలము ప్రక్కన తీగలూడగన్

హీనుడే

 దాన  ధర్మ ముల్ నిరతముఁ దానుజేయ

 సంతసం బొంద మిత్రులు సాదరమునఁ 

 జేయి చేతులు గలుపంగఁ జేరు గర్వ

 హీనుఁడే లోకమున గౌరవించఁబడును”

పదవీ విరమణ శుభాకాంక్షలు

 పదవీ విరమణ శుభాకాంక్షలు 

----------=======---==

వాసి గాంచు పఠనేని వంశమందు

పుట్టి తివి తల్లి దండ్రుల పుణ్య మలర

విద్య లందించు గురువుగా వినుతి కెక్కి

పదవి విరమించు శేఖర! ప్రస్తుతింతు

పదవిని నుండగ దెలియును

పదవీ విరమణము , గొప్ప వరమగును గదా

పదవీ విరమణ జనులకు

పదికిం బది మార్లు శివుని బ్రార్ధన జేయన్

పదవిని నుండగ జేయము

సదయుండగు శివుని బూజ సాకారముగన్

పదవులు దొలగిన జేతుము

పదవీ విరమణము గొప్ప వరమగును గదా .

ఎంద రెందరికో విద్యనంద జేసి

యోగ్యులుగ తీర్చి దిద్దిన యోధ వగుచు

 స్ఫూర్తినిచ్చిన సౌజన్య మూర్తి వీవు

సాటి యెవరును లేరు నీ సాటి వారు

నవ్వు చిందించు మోముతో నమ్రుడవయి

సత్య మార్గమే ప్రగతికి నిత్యమనుచు

నీతి నియమాలు దప్పక నిర్మలముగ

సేవ లందించితివిగద చేవ జూపి

తడబడని నడక నేర్పుచు

నడుగడుగున వెలుగులనిడు నాదిత్యుడవై

గడిపితివి గతము నంతయు

బడిపిల్లల మద్య నీవు భాసుర లీలన్

సకల శుభములు గలిగించు శంకరుండు

నాయురారోగ్య సంపద లన్ని యిచ్చి

కంటికిని ఱెప్ప యట్లయి కాచుగాత !

యెల్ల వేళల మిమ్ముల జల్ల గాను

ఆశీస్సులతో .......

పోచిరాజు సుబ్బారావు