పద్యప్రభంజనం

దేశభక్తి
....
దేశభక్తి యనం బడు దేశ మందు
వాసమును జేయు వారికి వలయు సాయ
మొనరఁ జేయుట యాపద యొనరు నపుడు
దేశ మనఁగ మనుషులుగ దెలిసికొనుము

 భారతీయసంస్కృతి
----
భారతీయుల సంస్కృతిఁ బ్రణుతి సేయ
నలువ కైన నసాధ్యము నరుని తరమె
యన్ని మతములు దనవిగా నాదరించి
సాయ మొనరించు ననిశము శత్రులకును

 జాతీయత
---
దేశ పౌరసత్వములు జాతీయత యయి
దేశ దేశముల కొక జాతి పరముగను
గీతమును బతాకము మృగ మాదు లలరు
గుఱుతులై చాటు దేశాల గొప్ప దనము

 భారతీయ వైభవము
----
అన్ని రంగాల యందును జెన్నుమీఱి
ఖండ ఖండాంతరములఁ జే ఖ్యాతి నొందు
పరమ పావన మైన దీ భరత భూమి
యాత్మ విశ్వాసమే ప్రజ కాయుధమ్ము