భాగవతాంశము.

వ.నెం.  104...పద్యము..భారవి...గణములు...భరభరభరవ...యతి..13అక్షరం..

--

శ్రీకర మైన యీ భాగవతంబునుం జెల్వపుఁ బాఠకుండునై

యేకరు పెట్టినం గల్గును సేమమే  యీశుని రక్షణంబునన్ 

శ్రీకరు బోధలన్ శ్రద్ధగ నేర్చినన్ శ్రేయము గల్గు దప్పకే  

సాకులు సెప్పకే యీశ్వరు గాధలన్  సంతతముం బఠింపుమా 1.

వ.నెం. 02 

పద్యము...అంతరాక్కర....గణములు...1సూర్యగణము , 2ఇంద్రగణములు,1చంద్రగణము....యతి.. 3వగణం అంత్యాక్షరి

---

ఏడు రోజుల వ్యవధి నెంచి  సరి చూచి 

కీడు నేరఁగ నార్తికి శుకమహర్షి 

పాడిగఁ బలికి  పుణ్య భాగవతము నా 

ఱే డగు బరీక్షితున కెఱిగించెఁ బ్రీతి  2.

వ.నెం. 06 

పద్యము...అల్పాక్కర....గణములు....2ఇంద్రగణములు,1చంద్రగణము....యతి...3వగణం ఆద్యక్షరం. 

---

భాగవతమ్మును బఠనమ్మును  

బాగుగ జేసిన బ్రహ్మాదులు 

వేగమె శుభములు ప్రీతు లయి   

యీఁ గల రెల్లర కింపుగను 3.

వ.నెం.  167. 

పద్యము...విద్యున్మాల....గణములు...మ-మ-గ-గ...యతి...5వఅక్షరం(వాడకున్న పరవాలేదు)

——

లోకారాధ్యా! యో శ్రీకృష్ణా! 

యా కామాంధున్  జంపం బూనన్  

లోకాలన్ గాపాడం గల్గున్ 

లోకేశా లోకాలిత్రాతా! 4.

వ.నెం. 26. 

పద్యము...కమలవిలసితము....గణములు...న-న-న-న-గ-గ.  యతి  9వఅక్షరం.

---

విలసిత వదనుడు విలువగు వానిన్ 

మిలమిల మెఱసెడు మెఱుపుల దేహున్ 

పలుకులు సొగసగు ప్రణయపు సూనున్ 

వలపున పిలిచెను భరతము పట్టన్ 5.

వ.నెం. 27. 

పద్యము....కరిబృంహితము...గణములు...భ న భ న భ న ర....యతి..13వఅక్షరం.

--

దప్పి గలుగ గజేంద్రుడు మడుగు దారిని గనుచు బోవఁగా  

నప్పుల రొద వినంబడ మదిని హర్షము గలుగ నీటిలోఁ 

జప్పుడు గలుగు నట్లుగ దిగుచు సంతస మొనర వారి లోఁ 

బప్పను రవము బిగ్గరగ చెవి బద్దలుగ విహరించెనే 6.

వ.నెం.28.  

పద్యం  .కలరవము......గణములు...స-న-న-న-ల-గ. ..యతి...8వఅక్షరం. 

--

సమరం బడలఁగ జరిగె జలమునం  

బ్రమదుం డగు కరిపతికి మొసలికిం   

గమలంగ నట సకల జల చరముల్ 

కుములంగను గొలఁకు దరి గజసతుల్  7.

వ.నెం. 29 

పద్యము...కలితాంతము....గణములు....త-జ-జ-ల-గ.... యతి...8వఅక్షరం.. 

-

ప్రహ్లాదుడు విష్ణుని భక్తుడు నై 

యాహ్లాదపు రీతిని నాతని పై 

సాహ్లాదపు రక్తినిఁ జట్టులతో 

నాహ్లాదము నొందుచు నాడెను జూ. 8.

వ.నెం. 30. 

పద్యము...కవికంఠభూషణము...గణములు....స జ స స స జ గ.   ..యతి..9వఅక్షరం. 

--

వినుమా విదర్భ పతి భీష్మకుడే తన కూతు రుక్మిణిం   

గనుమా యశోదకును గం దగు కృష్ణునితో వివాహమే 

యనుమానమే వలదయా ముదమారఁగఁ జేయఁ బూనెనే   

మన పెద్ద లందరును మంచిగ నాశిసు  లీయఁ గోరుదున్ 9.

వ.నెం.83.   

పద్యము...పణవము.....గణములు....మ-న-య-గ....యతి. 6వఅక్షరం.

---

కోపిం దాఁ గనుఁగొని యారుక్మిం  

జాపంబుం గొని జలజాక్షుండే 

తూపున్ వేయఁగఁ ద్రుటి గృష్ణుండే 

పాపాత్ముం డిలఁ బడె నార్తుండై 10.

వ.నెం. 145. 

పద్యము...మేఘవిలసితము....గణములు...మ-న-న-స.     యతి  6వఅక్షరం. 

---

ప్రాకారంబులు పటుతర మగుచో 

నాకారంబును  ననునయ దిశగా  

నా కార్యం బది నను గలసినచో 

మీ కార్యంబు సుమి సఫలము ప్రియా 

11.

వ.నెం. 74 

పద్యం.,...నందిని....గణములు....భ-త-జ-గ.  .. యతి 6వఅక్షరం. 

--

నమ్మితి నమ్మా నను గావుమా 

యమ్మల కమ్మా యభయంబునే  

యిమ్ముగ నిమ్మా యిటు చూడుమా 

కమ్మటి దానన్  గరుణింపుమా 12.

వ.నెం. 121 .

పద్యం  మణిమాల

గణములు త-య-త-య.

యతి 7వఅక్షరం.

---

నారాయణ యంచున్ నారాయణ నామం  

బా రాత్రులు గీతా లాపంబును జేయన్ 

రా రండని పిల్వన్  బ్రహ్లాదుడు నచ్చోన్ 

నారాయణు నాఖ్యల్ నాకమ్మును జేరెన్ 13.

వ.నెం. 135 

పద్యం. మనోరమ..

గణములు.. న-ర-జ-గ. 

యతి  7వఅక్షరం.

--

జలచరంబు నా  జలంబులోఁ  

గలయఁ దిర్గుచుం గనంగ దా 

జలము నందునం జకాచకా  

కలకలా యనంగ వింటివే 14.

వ.నెం.39

పద్యం  కౌముది 

గణములు  న-త-త-గ .

యతి  6వఅక్షరం.

---

శుకుడు బోధించు ఙ్ఞానంబుచే   

నిక పరీక్షిత్తె మోక్షార్థమై   

సకల విన్యాసముం జేయఁగన్   

ముగితి నొందెన్ మురారాతిచే  15.

వ.నెం. 111 

పద్యం.  భ్రమర విలసితము 

గణములు.  మ-భ-న-వ. 

యతి. 6వఅక్షరం. 

---

అంతం గన్పట్టు హరి యెట ననం   

జింతాగ్రస్తుండ! చెయిదములలోఁ   

బంతంబున్ వీడి ప్రభు వగు హరిన్ 

సంతోషం బంద శరణ మనుమా

(ప్రహ్లాదుడు తండ్రినుద్దేశించి) 16.

వ.నెం. 177 

పద్యం.  శుద్ధవిరాటి  

గణములు.  మ-స-జ-గ. 

6వఅక్షరం యతి

---

ఆవిష్ణుండట నాగ్రహంబునం  

జేవం జూపుచు సింహ రూపుడై

చావం జీల్పఁగఁ జార ణాదులే  

పూ వానన్ రహిఁ బో కురించిరే 17.

వ.నెం. 122 

పద్యము.  మణిరంగము  

గణములు  .ర-స-స-గ. 

యతి  6వఅక్షరం.

--

కొండ క్రిందకుఁ గూలఁగఁ జేయన్ 

మండు టెండను మండఁగ నుంచన్ 

బండ రాళ్ళను భారము వెట్టన్ 

నండగా హరి  యాయువు గాచెన్ 18.

వ.నెం .126 

పద్యము  మత్తహంసిని 

గణములు.  జ-త-స-జ-గ. 

యతి  7వఅక్షరం. 

--

క్షణానఁ గృష్ణుండు సతి రుక్మిణీ మణిన్  

జనాలు చూడంగ సచివుల్ భయంబునన్ 

రణం బొనర్పన్ బలము లేక పాఱఁగా  

మనోనుకూలంబు మగుడించి యేఁగెఁ జూ  19.

వ.నెం. 35 

పద్యము.  కుసుమ విచిత్రము 

గణములు  న-య-న-య 

యతి  7వఅక్షరం. 

--

కలియుగ మందుం గఠినపు భక్తిం  

గొలిచిన గృష్ణుం గువలయ మందుం 

బలికినఁ బేరుం  బగలును ఱేయిన్  

సులువుగ వచ్చున్ సుగతులు దల్పన్    20.